Туркманистонда аҳолини COVID-19 га қарши «Sputnik V» вакцинаси билан эмлаш ишлари олиб борилмоқда. Ушбу жараён жорий йилнинг февраль ойида бошланган. 

Расман коронавирус билан касалланиш ҳолатлари мавжуд бўлмаган мамлакат ўтган ойда бир вақтнинг ўзида иккита рус вакцинасини рўйхатдан ўтказган ва эмлашни бошлаган.

Туркманистон расмийлари ва давлат оммавий ахборот воситалари эмлаш бошлангани ҳақида хабар бермаган. Бироқ «Хроника Туркменистана» нашрига кўра, шу кунларда Ашхободда соғлиқни сақлаш ва ҳуқуқни муҳофаза қилиш органлари ходимлари COVID-19 га қарши «Sputnik V» вакцинаси билан эмланмоқда. 

Юқумли касалликларнинг олдини олиш ва даволаш маркази ва C. А. Ниёзов номидаги тиббий маслаҳат марказининг деярли барча ходимлари эмланиб бўлган. Қолган фуқароларни эмлаш эса март ойидан бошланиши кутилмоқда.

Маълумотларга кўра, биринчи эмлаш бепул, иккинчиси эса ишлайдиган одамлар учун пуллик бўлади. Сув хўжалиги давлат қўмитаси ходимларидан, шунингдек энергия таъминоти, автомобиль транспорти ва отчилик ишчиларидан эмлаш учун 200 манат (602 минг сўм) йиғилади.