Ўзбекистон Республикаси Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги жорий йилнинг март ойида Beeline Uzbekistan компаниясига нисбатан “Истеъмолчиларнинг ҳуқуқларини ҳимоя қилиш тўғрисида” Ўзбекистон Республикасининг Қонуни ва “Мобиль алоқа хизматларини кўрсатиш қоидалари” талаблари бузилиши белгилари бўйича иш қўзғатган эди.

«2019 йилнинг июль ойида “UNITEL” МЧЖ томонидан абонентларни “Хабардор бўл” хизматига бепул промо-даврга (10 ва 30 кунга) уланиши бўйича промо-акция ўтказилиши тўғрисида эълон берилган. Ушбу промо-акция мазкур хизматга уланмаган абонентлар учун мўлжалланган. Бироқ, бепул давр тугаши билан, ушбу хизмат автоматик равишда ўчирилмаган (промо-акция шартларига кўра). Аксинча, ўрнатилган нарх бўйича кунлик 240 сўм миқдорида абонетларга ҳисобланган.», - дейилади агентлик хабарида.

Маълум қилинишича, ушбу промо-акцияга умумий ҳисобда 3,2 миллиондан ортиқ абонент уланган бўлиб, улардан 1,2 миллионга яқини томонидан мазкур хизмат мустақил равишда ўчирилган. 2020 йил май ҳолатига ушбу хизмат деярли 1,3 млн. абонентда ёқилган ҳолатда бўлишда давом этган.

«Агентликнинг Махсус комиссияси томонидан 2020 йил 3 июль санасида “UNITEL” МЧЖга нисбатан Ўзбекистон Республикаси “Истеъмолчиларнинг ҳуқуқларини ҳимоя қилиш тўғрисида”ги Қонунининг 21-моддаси ҳамда Мобиль алоқа хизматларини кўрсатиш қоидаларининг 25 ва 26 бандлари бузилиши юзасидан қарор қабул қилинди ва кўрсатма берилди.»,- маълум қилди Истеъмолчилар ҳуқуқларини ҳимоя қилиш агентлиги матбуот хизмати.

Агентлик томонидан қўзғатилган иш бўйича 9 ой давом этган мунозара истеъмолчилар фойдасига ҳал этилди. Бугунги кунга келиб, Beeline Uzbekistan абонентларига етказилган зарар
20 миллиарддан ортиқ миқдорда баҳоланмоқда.

Хабар берилишича, компания томонидан ушбу маблағлар абонентлар ҳисобига қайтарилиши бошланди.