Irrigatsiya instituti O‘zbekiston tarixida birinchi marotaba dunyoning kuchli universitetlari reytingiga kirdi

0
51
marta oʻqilgan

Toshkent irrigatsiya va qishloq xo‘jaligini mexanizatsiyalash muhandislari instituti mustaqil O‘zbekiston tarixida birinchi marotaba 2020-yil uchun QSning Sharqiy Yevropa va Markaziy Osiyo davlatlari universitetlari reytingida qayd etildi. Bu haqda O‘zA xabar bermoqda.

Foto: moodle.tiiame.uz

Bu Oliy va o‘rta maxsus ta’lim vazirligining Respublika oliy ta’lim muassasalarining xalqaro nufuzini oshirish maqsadida Times Higher Education va QS kabi dunyoning yetakchi xalqaro agentliklari bilan so‘nggi ikki yil ichida olib borgan hamkorligi natijasidir.

Toshkent irrigatsiya va qishloq xo‘jaligini mexanizatsiyalash muhandislari instituti QS reytingida akademik so‘rovnoma, ish beruvchilarning bahosi va ilmiy salohiyati kabi mezonlarda Sharqiy Yevropa va Markaziy Osiyo davlatlari universitetlari o‘rtasida ijobiy ko‘rsatkichlarni qayd etib, 301-350 o‘rinlar oralig‘idagi universitetlar qatoridan joy oldi.

Ushbu reytingda 1-o‘rinni Lomonosov nomidagi Moskva davlat universiteti, 2-o‘rinni Sankt-Peterburg davlat universiteti egalladi. Reytingda Rossiya, Chexiya, Turkiya, Vengriya, Polsha, Ruminiya, Sloveniya, Xorvatiya, Belarus, Bolgariya kabi davlatlarning yetakchi universitetlari joy oldi.

Hozirda vazirlik tomonidan xalqaro ekspertlar bilan birgalikda respublikaning yetakchi oliy ta’lim muassasalarini bosqichma-bosqich xalqaro reytingga kiritishga tayyorlash bo‘yicha ishlar olib borilmoqda.

Xorijiy ekspertlar tomonidan respublikaning 10 ta oliy ta’lim muassasasi (O‘zMU, TIQXMMI, TDTU, TATU, SamDU, TDAU, UrDU, TTA, Turin politexnika universiteti, QQDU) tanlab olindi va ularning Times Higher Education va QS bazasida tegishli profillari yaratildi. Ekspertlar shu 10 ta oliy ta’lim muassasasi bilan yaqindan ishlamoqda.

Izoh qoldiring:

Please enter your comment!
Ismingizni kiriting