Shavkat Mirziyoyev Abu-Dabidagi Shayx Zayd maqbarasi va masjidini ziyorat qildi

0

Shavkat Mirziyoyevning Birlashgan Arab Amirliklariga rasmiy tashrifining asosiy tadbirlari boshlandi. Bu haqda Prezident matbuot xizmati ma’lum qildi.

Foto: Prezident matbuot xizmati

Davlat rahbari, taomilga ko‘ra, dastlab Abu-Dabi shahridagi Shayx Zayd bin Sulton Ol Nahayon maqbarasi hamda masjidini ziyorat qildi.

Shayx Zayd bin Sulton Ol Nahayon Birlashgan Arab Amirliklarining birinchi prezidenti bo‘lgan. U 2004-yili o‘zi qurdirgan mazkur masjid yonida dafn etilgan. Bugungi kunda ushbu masjid va maqbara mamlakat aholisi uchun tabarruk maskanga, xorijiy delegatsiyalar rahbarlari tashrif buyuradigan majmuaga aylangan.

Foto: Prezident matbuot xizmati

Bu masjid dunyodagi eng katta masjidlardan biri bo‘lib, qurilish ishlari 1996-yildan 2007-yilgacha davom etgan. Unda bir vaqtning o‘zida 40 ming kishi namoz o‘qishi mumkin.

Majmuaga tashrif asnosida Shayx Zayd bin Sulton Ol Nahayon ruhiga Qur’on tilovat qilindi.

Prezidentga masjidning qurilish tarixi, o‘ziga xos xususiyatlari, sayyohlar va ziyoratchilar uchun yaratilgan sharoitlar haqida so‘zlab berildi.

Foto: Prezident matbuot xizmati

Shavkat Mirziyoyev maqbaraning Ziyoratchilar kitobida dastxat qoldirdi.

Davlat rahbari “Vahat al-Karama” yodgorligiga gulchambar qo‘ydi.

“Qadr-qimmat vohasi” ma’nosini anglatuvchi ushbu memorial Birlashgan Arab Amirliklari ozodligi va birdamligi uchun qurbon bo‘lganlar sharafiga bunyod etilgan. Yodgorlik bir-biriga tayanib turgan 31 blokdan iborat bo‘lib, rahbarlar, harbiylar va fuqarolar o‘rtasidagi o‘zaro hamjihatlik va qo‘llab-quvvatlash ramzi hisoblanadi.

Davlat rahbari yodgorlikning Faxriy mehmonlar kitobiga dastxat qoldirdi.

Izoh qoldiring:

Please enter your comment!
Ismingizni kiriting