G’afur Rahimov AIBA prezidenti lavozimidan ketmoqchiligini ma’lum qildi

0

Xalqaro boks assotsiatsiyasi (AIBA) prezidenti G‘ofur Rahimov iste’foga ketmoqchiligini ma’lum qildi. Bu haqda AIBA saytida xabar qilingan.

“Men AIBA ijroiya qo‘mitasi a’zolarini nizomga va prezidentga o‘z vakolatlarini amalga oshirishdan bosh tortishga imkon beruvchi AIBA qonunosti hujjatlariga muvofiq holda AIBA prezidenti lavozimidan ketmoqchiligimdan xabardor qildim. Men bu masalani muhokama qilish va prezident vazifasini bajaruvchini saylash jarayonini boshlash uchun ijroiya qo‘mitasi a’zolarini dam olish kunlari teleanjumanga chaqirtirdim”, deb aytgan Rahimov.

Rahimov Xalqaro Olimpiya qo‘mitasining o‘z nomzodini qo‘ymaslik iltimosiga qaramay, 2018 yil noyabrda AIBA rahbari etib saylangandi.

AQSh moliya vazirligining xorijiy aktivlarni nazorat qilish departamenti Rahimovni O‘zbekistonning bosh jinoyatchilaridan biri sifatida sanksiyalar ro‘yxatiga kiritgan. Shuningdek, AQSh moliya vazirligi Rahimovning dollarlarda har qanday moliyaviy operatsiyani amalga oshirishiga taqiqlov kiritgan.